Èrt, poejìa e musega fèsc perpeèr la comunanza

No l’é stat demò folclor chest an a la sègra de Sèn Vile, ma ence cultura e recordanza de persones da Moena che entorn la metà del secol passà con sia operes les ne à lascià na ritajon preziousa.

La sodesfazion per chest é stata uzèda fora en sabeda ai 26 domesdì te la sala de la scoles dedichèda al maester Simonin Maza da desvalives entervegnui, e duta la jent ruèda ence dai etres paìjes de Fascia a empienir i posć desponiboi te la gran sala à confermà che la scomenzadiva proponeta dal Comun ensema con l Grop Ladin e l’Union de Fascia à dalbon garatà.

L’obietif del domesdì l’era recordèr trei persones de nonzech se n jites a 10 egn una da l’autra: acà 30 egn Ermanno Zanoner (Luigi Canori), acà 40 egn Valentino dell’Antonio (Tinoto Monech) e jai 50 egn Cirillo dell’Antonio (Zerilo Bora), ma che ampò les é states leèdes una a l’autra da raporc strenc de colaborazion e da na medema vijion de l’emportanza de l’èrt e de l’identità ladina, te vigni sia esprescion, per fèr crescer sie paìsc e sia val no demò dal pont de veduda culturèl ma ence sozièl e economich.

A orir la scontrèda recordan l Canori, l Zerilo e l Tinoto l’é stat la vizeombolta Cristina Donei, che à sport sie salut ensema con l’ombolt Alberto Kostner e l’à rengrazià l Grop e l’Union di Ladins per la colaborazion, recordan che l projet jirà inant con de autra scomenzadives ence con l’Istitut Cultural Ladin e la Scola de Fascia.

Endèna l’é stat enjignà trei publicazions: l liber »Cirillo dell’Antonio Bora e la Scuola d’arte di Moena - documenti e testimonianze«, dat fora dal Comun de Moena ensema con l Grop Ladin e rencurà da Annalisa Zorzi e Fabio Chiocchetti, la riedizion de »Dò l troi de la speranza«, che regoi la poejìes del Tinoto e l’é stat rencurà da Fabio Chiocchetti e dat fora dal Grop en coedizion con la Cassa Rurala Dolomites e l nef numer de »Nosha Jent« dedicà en gran pèrt ai trei personajes. A chisc l’é da jontèr la partidures e l CD »Ciantie da mont, da spas e dal cör« del Canori, dat fora al scomenz de chest an dal Grop Ladin e l’ICL.

La presidenta del Grop Angela Chiocchetti à dit che »i à metù a la leta sove competenze con spirit umol e ence te tempes de meseria economica i à entenù che per far renascer na comunanza l’é besogn de l’art, la letradura e la musega; i à cognù padir envidie e gelojie ma i ne à lascià trop de bel e de bon.«

»L’Union di Ladins à tout sù con gaissa la proponeta de valorisar chisc trei omegn – à dit l president Fernando Brunel – e voi rengraziar Annalisa e Fabio per l gran lurier per le publicazion e la Cassa Rurala Dolomites per aer sostegnù la riedizion.« Brunel à dapò dit che l’Union volessa dèr fora l liber de anatomia scrit per todesch dal Zerilo con la traduzions per talian e ladin, da poder durèr ence te scola.

L procurador Giuseppe Detomas à portà sie salut lodan la scomenzadiva de recordèr chi che aea la capazità de vardèr inant e se tor fora dal conformism, ence a risech de no vegnir entenui, perché demò con chesta persones la sozietà pel crescer.

La parola é jita dapò a Annalisa Zorzi e Fabio Chiocchetti, che i à prejentà la publicazions. Zorzi à recordà la biografia del Zerilo e l’à rengrazià duc chi che à didà con testimonianzes, documenc e retrac a meter ensema l liber su la Scola d’art de Moena, en particolèr Giuseppina Jellici, Maria Lorenz e Giovanni Defrancesco Gide.

»L liber porta dant la storia de la Scola d’art travers le relazion e le letre del Zerilo medemo – à dit Chiocchetti – e l moscia ence l’aspet uman de na persona se n jita da so paes mingol empermalada. Chisc documenc podarà didar a far n bilanz storich che fosc ades l’é amò massa prest per poder far.« Chiocchetti l’à amò sotrissà la rei de relazions anter chisc trei personajes recordan che l’é emportant i valorisèr ades che l’é a la leta i strumenc.

Apontin per chest l domesdì é jit inant con la letura de vèlch poejìa del Tinoto e con la cianties del Canori portèdes dant con gran braura da Angela Chiocchetti, compagnèda al piano da Paolo Bernard con gran aprijiament e batiman del publich.

La scontrèda l’é stat ence l’ocajion pe ge sporjer l develpai, con n maz de fiores, a Giuseppina Jellici e a Rosalba Zanoner che la ge à donà al Comun de Moena l basrelief con la Pietà de la scola del Zerilo che ades fèsc bela parbuda te la sala Simonin Maza, che l’é stat recordà ensema con l maester Felize Defrancesco, se n jit da pech. L liber »Dò l troi de la speranza« ge vegn sport da la Cassa Rurala Dolomites ai sozi de Moena che i lo domana e da l’Union di Ladins a si sozi e aboné a Nosha Jent. L liber »Cirillo dell’Antonio Bora e la Scuola d’arte di Moena« vegn enveze venù per finanzièr l restaure del basrelief de la scola del Zerilo sora l’usc de la calonia de Moena.

Lucia Gross