Noscia Val de Fascia amò più bela

L’Union di Ladins de Fascia te si beleche 70 egn de fondazion, olache più che auter la se à cruzià de cultura, de nosc lengaz e tradizions, l’à tout posizion, soraldut tel passà, envers l’aspet teritorièl, urbanistich e no demò, ence sun chel speculatif che noscia val à abù ti egn dal 1970 en ca. L’ambient l’é unich e l cogn vegnir rencurà e tegnù da cont.

A jir stroz fora per noscia bela val e su per mont l president de l’Union di Ladin Fernando Brunel veit e conscidra l bel ma ence l burt, chel che vegn fat per ressanèr e meter a post strèdes, mures e pènc ma ence chel che é dò che va a remengo. Per chest l president Brunel, ensema col Consei de l’Union, l’à metù ensema n dossier da l’inom »Noscia Val de Fascia amò più bela« che chisc dis passé l’à portà personalmenter te Comun general de Fascia e te duc i Comuns. Te chest dossier l’é stat documentà con scric, retrac fac via per l 2020 e l 2021 e articoi che é stac publiché su La Usc di Ladins, chel che fossa bel e benfat che vegne metù a post per ge dèr na mior parbuda al teritorie, richeza per duc i sentadins de noscia val.

»Cherdon che na spenta e na maor conscidrazion l’aessa da vegnir dal Comun general de Fascia – scrif l president Brunel te sia prejentazion dantfora – ritadin de la veiora e storica Comunità de Fascia desche Ent propositif e de coordenament anter duc i Comuns. Con chest dossier l’Union di Ladins no vel dèr giudizies de nesciuna sort ma demò n contribut per rencurèr noscia bela val.«

La Gran Strèda de la Dolomites: mures en malester

Dantfora l president Brunel à scrit jù en curt la storia de la Gran Strèda de la Dolomites, la maor opera fata al scomenz del 1900 che à portà n gran benesser te noscia valèdes. L’opera é stata pissèda dal pionier del turism dolomitan Theodor Christomannos che l se à dat jù per bona pèrt de sia vita al ben del svilup sozièl de la jent de la valèdes de la Dolomites. »Emben la pèrt de Fascia de chesta gran strèda é bon en malester – scrif Fernando Brunel: na pèrt di mures de acà 120 egn i é aló da testamonech, amò bie e en orden, enveze chi fac ti ultimes egn i é aló en meseria, chest se l veit soraldut su la strèda del jouf de Sela.« Fèr sù la strèda de Fascia l’era stat n gran empegn per chi egn per noscia jent: manoèi, minadores, feghins che i sbarèa fora i gregn perons, tisleres e marangons, fauresc e sćiarpelins che i lurèa l sas e i à fat sù i mures a regola d’èrt che amò se pel veder dò 120 egn. Aboncont nia dura per semper e ence chisc mures i é dò che i se desfèsc, te cerc posć fossa ben fat che i vegne metui a post e en segureza, tant sul stradon de Fascia, che su la strèda del Jouf de Ciareja, che sun chela del Jouf de Sela, dant che sozede vèlch da burt.

La tofles sul monument de Pordoi: na faussità storica da concèr ite

De november del 1904 l’é stat la zerimonia ofizièla de inaudazion de la Gran Strèda de la Dolomites sun Jouf de Pordoi, descheche testimoniea i retrac fac dal fotograf fascian Franz Dantone Pascalin da Gries, con la benediscion del monument da pèrt del piovan de Fodom Isidoro Vallazza. Sul monument l’é stat metù sù la tabeles con la scrites e l’Ègua dopia Imperièla de l’Imper de Austria-Ungaria. La scrites originèles é documentèdes tel gran liber del professor Carlo Artoni »La valle di Fassa nei secoli della trasformazione« publicà da l’Istitut Cultural Ladin del 2001. La tofles originèles del 1904 é states toutes demez e del 1930 l’é stat metù sù na plota voluda da l’autoritèdes fascistes che l’é na faussità storica. »Fossa ben fat stampèr la doi scrites con l’Ègua dopia descheche l’é stat documentà ti retrac publiché sul liber de Artoni e les meter sù endodanef sul monument – scrif Brunel. Noscia comunanza à l doer de concèr ite e ge dèr chel giust recort a la Strèda de la Dolomites voluda da Theodor Christomannos, finanzièda dal Land Tirol con l lurger e l suor de nesc artejegn, de noscia jent.«

Pré nossec e toronaes pericolouses

Gran pèrt di retrac del dossier revèrda pré nossec, pré no seé da egn che i aessa da vegnir rencuré con l coordenament anter i Comuns, i bachegn e i privac patrons di terens. Ben segur che no l’é bel veder la rives, i ciucegnes e i pré che resta da seèr. »Fossa ben fat – scrif Fernando – che ence i Comuns se tole sù l lurger e i se enjigne la massaria aldò.« Amò na atenzion particolèra vegn data a la desvaliva toronaes sul tegnir de Fascia. L’é de bogn ejempies desche chela de Piciocaa, chela de Cianacei, chela de Poza, chela de Vich, chela sul ruf de Menudol anter Moena e Soraga e chela ja Le Part. Ma n’é de cheles olache l’é pericol per la jent che va pe, soraldut chela de Capitel de la Roca sul tegnir del Comun de Soraga olache mencia patoch l marciapé. »I Comuns podessa spenjer tel Servije Strèdes de la Provinzia de Trent percheche les vegne metudes en segureza olache mencia la strisces e l marciapé« – scrif amò l president Brunel.

L legnam per noscia jent per fèr sù sieves desche n’outa

En ultima l’Union di Ladins domana che i Comuns e la Frazions mete a la leta per l besegn di sentadins, ma ence da poder durèr dai Comuns enstesc, l legnam crodà tel bosch per fèr sù sieves, piles de lèrsc e de pin e brees de lèrsc e de pin che les tegn fora l temp. Con l tormen Vaia e la gran cantità de neif l’é crodà n muie de piantes tel bosch. L’idea l’é chela che i Comuns se tegne na pèrt de chest legnam per l dèr fora a si sentadins o che vegne fat sù sieves descheche fajea enlouta nesc veies. L’Union di Ladins à publicà l’Almanach 2019 belapontin sun chest argoment. Chiò se troa l studie de desvaliva sorts de sieves fat ensema ai studenc de la Scola d’Èrt. Te l’introduzion l’é stat ence documentà coche vegn brujà la pontes de la piles a Longiarù te la Val Badia a servije di bachegn e di sentadins de la val.

N gran lurier de documentazion, de regoeta de retrac, de scric e de articoi che l’Union di Ladins ge consegna al Comun general e ai Comuns de Fascia. N dossier che vel esser n contribut de idees e de indicazions per vardèr con eies desferenc nesc paìjes, nosc teritorie e noscia bela val che la ne é stata consegnèda da nesc veies e nos aon l doer de la rencurèr.

Monica Cigolla