L nef Statut

L at costitutif de l’Union di Ladins de Fascia e Moena, registrà dal notèr Rizzi del 1955.

Chest an la Radunanza à n moment de gran emportanza ajache cogn vegnir aproà l nef Statut de l’Union di Ladins de Fascia. L test, descoret jà te Consei, l é stat lurà fora aldò de la Reforma del Terz Setor dal conseier e avocat Andy Rossi, che à lurà con empegn e profescionalità. L tol ite 25 articoi che prejenta l lurier e la strutura de la sociazion. Vedon en curt i ponc de maor emportanza.

Tel preambol vegn dit che la sociazion la era stata metuda su ofizialmenter ai 19 de mé del 1955 con at del notèr Giovanni Rizzi e che la é sozia fondadora de la Union Generela di Ladins dla Dolomites. I zii de la sociazion l é l stravardament e la promozion del lengaz, de la cultura e de l’identità di Ladins de Fascia e la colaborazion coi ladins del Sela. L’Union rencura l patrimonie linguistich, sozièl, storich, culturèl e ambientèl e la endreza atività culturèles, che pel esser ence de informazion e editoria.

Vegn pervedù mudamenc en cont de la califica del sozio: se no vegn renovà l tesserament, l’adejion vegn touta demez do 3 egn. I orghegn sozièi l é la Radunanza, l Consei e l Colege di Probiviri, se l vegn nominà. La Radunanza, tel nef Statut, vegn despartida anter Ordenèra e Straordenèra.

Tel nef Statut vegn smendrà l numer di conseieres (ades 21): i componenc podarà esser da amancol 5 persones a no più che 13. Chest tant l é stat dezedù per aer n Consei che laore miec e più flessibol. Del Consei fèsc pèrt de derit l President onorèr e i Presidenc di gropes locai, desche l Grop ladin da Moena. L é stat pervedù ence la neva fegura de secreter:a, na persona paèda che deida l President e l Consei a endrezèr l’atività de la Sociazion.

A livel de Comun o frazion pel esser metù a jir n ‘Grop ladin’ col zil de portèr dant l’atività de l’Union a livel local: l grop laora aldò del statut e de la dezijions de l’Union, i à carater operatif e no l é sogec autonomes. Se la sociazion aessa da vegnir desfata, sie patrimonie editorial ge vegnarà dat al Istitut Cultural Ladin ‘Majon di Fascegn’ e chel che vanza a l’UGLD.