A Oies da Freinademetz, sènt da 20 egn
En sabeda ai 30 de setember domesdì vegn endrezà l pelegrinaje te la Val Badia per onorèr l miscionarie stat te la Cina e prum sènt ladin. L'Unnion di Ladins de Fascia endreza n pulmin per jir via.
En sabeda ai 30 de setember l’Union Generela di Ladins dla Dolomites endreza l pelegrinaje a Oies da Sèn Giosef Freinademetz, n apuntament de fe e devozion de la comunanza ladina doventà oramai tradizionèl.
Chest an l pelegrinaje à amò n valor de più ajache l é l cedean di 20 egn da la santificazion del miscionarie badiot, stata ai 5 de otober del 2003.
L program perveit che i pelegrins se bine da les 14.30 te cortina de la gejia de Sèn Linert a Badia e da lo, do n moment de benvegnù e de recordanza de Hilda Pizzinini, da les 15.00 pea via la procescion sul troi de la Via Crucis enscin al santuarie de Oies, olache da les 16.00 vegn ofizià la messa ladina viventèda dal Cor de Ampez. Do messa se podarà veder la cèsa del Sènt e sarà n pìcol marendel per duc i pelegrins.
L’Union di Ladins de Fascia envia duta la comunanza de val a jir a onorèr nosc soul sènt ladin e la endreza n pulmin debant che pea via da Sèn Jan (Piaz visavì l Fassa Coop) da les 12:00. Chi che vel se n emprevaler i cogn se prenotèr te la senta de la sociazion, al numer de telefon 0462 764545, al più tèrt per les 12 de en jebia ai 28 de setember. (Lucia Gross, www.lausc.it)
