Ciantie da mont, da spas e dal cör de Canori

Anter la produzion musicala de Luigi Canori, apede al “Laurin” e a la cianties da devozion, l repertorie profan à abù na gran emportanza per la comunanza de Moena e de la Ladinia entrìa. Valguna de chesta cianties é ruèda dreta tel cher de la jent fin dai egn ‘46-’48, canche la comunanza se descedèa a neva vita e ence per via de la cianzons del Canori descorìa bel pian l valor de so lengaz e de sia identità ladina: cianties ispirèdes a l’ambient da mont, dedichèdes al paìsc, a la valèda o a la bela crepes de la Dolomites, ma ence cianties de carater intimistich, opuramenter toc “da spas”, da ciantèr en compagnìa e en alegrìa. Valguna é amò en doura anchecondì, ciantèdes da cores desferenc, ma la maor pèrt é scrites zenza fal per una o più oujes e pianofort: e l’é te chesta viesta che podon descorir e documentèr l’ispirazion più sćiantiva de nosc Autor (fch).

“Ciantie da mont, da spas e dal cör” vegn dat fora da l’Istitut cultural ladin del 2020 e da la scola de musega “Il Pentagramma” en colaborazion con l Grop ladin da Moena e con l contribut de la fam. Zanoner-Gabana, Valdagno (VI). Tel CD 14 tòc per n total de 53:56.

Tel CD l quartet “Demò Ousc” (Angela Chiocchetti, Luisa Chenetti, Stefano Volcan, Martin Bernard) e al piano Paolo Bernard. Direzion artistica de Fabio Chiocchetti del Goti, registrazion e mastering de Marco Mattia, grafica e soracuerta de Dario Bosin e retrac de Stefano Volcan.

Tesć, partidures e info tel liber: CANORI III - Cianties da mont, da spas e dal cör, ICL, 2020.