Ai 9 de otober del 2005 a Pera
Da la letra del president Antone Pollam ai soz (31/08/2005):
L’an 2005, descheche saede, l’é n an particolarmenter emportant per l’Union di Ladins, ajache l’é l 100° cedean de l’Union Generèla di Ladins dla Dolomites e l 50° cedean de l’Union di Ladins de Fascia. Per chest ge tegnon che la scomenzadives che aon en program chest an posse garatèr al miec. […] L secondo apuntament l’é la tradizionèla “Festa del Rengraziament”, che vegnarà endrezèda en domenia ai 9 de otobera Poza e Pera, e l’arà desche tem zentrèl l moviment ladin con sia storia e so cedean. Se troon duc te piaz de Vac entorn les 9.00 per dapò jir en defilèda fin te gejia de Pera olache vegnarà ofizià messa grana da les 10.00 dal decan don Bepi Da Prà. Dò messa se jirà duc chenc endò en defilèda te tendon de Poza olache sarà i descorsc de l’autoritèdes, la prejentazion de la neva publicazions, na bona marena con de bela mùsega. Chest an la festa del Rengraziament pea via jà la sàbeda ai 8 de otober, ajache da les 17.00 te teater de Ciampedel sarà n debatit entornvìa l moviment ladin e da les 21.00 l’é pervedù n spetàcol de teater ladin dal tìtol “Ala inrescida dl ladin perfet”.
N gran braciacol a Danilo
Te chesta festa l’Union di Ladins de Fascia à volù ge sporjer l rengraziament a duc i idealisã che se à dat jù tel moviment ladin travers la recordanza del stimà e benvolù president onorarie, Danilo Dezulian del Garber, se n jit ai 12 de oril de chest an. L moment de maor emozion l’é stat apontin canche la ousc de Danilo, che é amò te duc nesc cheres, à ressonà tel tendon de Poza, travers na video-intervista touta sù l’an passà. Con paroles deldut adatèdes per chesta ocajion, Danilo à dit che cognon ge n saer gra a duc chi che se à dat jù canche l’era dut più senester, canche duc era de contra. L’à rejonà ence de la sodisfazions e di obietives arjonc te chisc egn dal moviment e l’à fenì palesan la speranza de poder sentir, fora per la strèdes de Fascia, jent che rejona n bel lengaz ladin. Ai 12 de otober l’é stat giusta 6 meisc che Danilo ne à lascià. Sia fémena Giusi, te chesta ocajion lo vel recordèr con chesta paroles: “l’é stat n istà freite trist, papi, tu me mence semper de più.”