facebook

Storia

Curta storia de l'Union di Ladins de Fascia

Ti prumes egn dò la seconda Gran Vera i Ladins taca a se troèr te Sociazions e Union per se remir al fascism che l li conscidra “na macia grija da gratèr via”.

Del 1945 a Meran nasc l’Union Culturèla di Ladins, de chela che fèsc pèrt ence i fascegn Giudo Iori Rocia e don Massimiliano Mazzel, che envìa duc i ladins de Fascia a se dèr jù per defener sia identità. Del 1946, an de la gran radunanza di Ladins sun Sela, Guido Iori met fora l sfoi periodich “Zent Ladina Dolomites” e a la fin de messèl, sun scomenzadiva de don Massimiliano Mazzel, nasc l’Union di Ladins de Fascia, che vegnarà legalmenter costituida demò egn dò, ai 19 de mé del 1955, con at del notèr dotor Giovanni Rizzi, sotescrit dal medemo Rizzi (che era jà dant a cef de la sociazion ladina), dal dotor Giacomo Jellici, dal dotor Simone Sommariva e da don Mazzel, che vegn nominà president.

L’Union di Ladins de Fascia se dèsc jù per la defendura del folclor e per la difujion de la cultura ladina soraldut te la scola, su l’ejempie de Gherdena e Badia olache l’é stat autorisà la “scola paritetica” con mesa lezions per talian, mesa per todesch e n’ora de ladin; te Fascia enveze i scolees cogn rejonèr talian ence te cèsa e i vegn adertura spervaji che “l ladin no serf a nia”.

 Ti egn ’60 l’Union di Ladins, enceben pureta de ressorses finanzières, se dèsc jù con sbunf: la stampa e la dèsc fora te la scoles l Dizionèr fascian-talian, la envìa via la publicazion de la revista che vegn fora n’outa al meis “La Veisc”, la domana che vegne nominé ensegnanc de ladin per l’ensegnament de la cultura ladina te la scoles, e en fasa de revijion del Statut de Autonomìa la domana che ai ladins de Fascia vegne arsegurà i medemi deric di ladins de Gherdena e Badia. Dò egn de scontrèdes e batudes, del 1970 vegn conzedù l’ensegnament te scola de 1 ora a la setemèna de ladin, che vegn fata (no zenza dificoltèdes e contrasc’) da doi ensegnanc sun duta la val. 

L’é stat vent na batalia ma jà se verc n auter front, che ti egn ’70 veit l’Union di Ladins en pruma linea per domanèr l Comprenjorie Ladin de Fascia, contra l projet de la Provinzia de Trent de meter Fascia e Fiem te n soul Comprenjorie. Trent no vel conzeder nia e coscita, dò la publicazion del nef Statut de Autonomìa del 1972, che amò n’outa no tegn en conscidrazion la domana che ai ladins de Fascia vegne recognosciù i medemi deric di ladins del Sudtirol, l’atività de l’Union di Ladins scomenza a se spostèr dal ciamp culturèl a chel politich, con intervenc ti comuns per domanèr l’anescion a la Provinzia de Busan. Te l’Union di Ladins i componenc che vel se dèr jù tel ciamp politich à la soramessa e don Mazzel, che no vel se esponer massa, de mèrz del 1973 l dèsc jù sia demiscions da l’Union di Ladins de Fascia, che va inant te so empegn ence politich sot la presidenza de Remo Locatin. 

Anter i obietives arjonc ti egn dò, soraldut de gra a l’Union di Ladins, l’é da recordèr l’Istitut Cultural Ladin de Fascia, istituì da la Provinzia de Trent del 1975, la lege provinzièla nr 19 del 1976 che stabelesc l recognosciment teritorièl di 7 comuns ladins de Fascia e la costituzion del Comprenjorie Ladin de Fascia destacà da chel de Fiem, del 1977.

 De november del 1976 vegn nominà president de l’Union di Ladins de Fascia Danilo Dezulian del Garber. Del 1983 Dezulian l’é ence anter i fondadores del moviment politich ladin de Fascia, l’Union Autonomista Ladina, che sarà bona de ge dèr a la val n raprejentant te Consei Provinzièl e tel Parlament, dant col senator Ezio Anesi rechia e dò co l’onorevol Bepe Detomas. 

L’Union di Ladins de Fascia sostegn l moviment politich e endèna la va ence inant con sia atività tel ciamp culturèl e linguistich, la met en pé e la endreza la redazion fascèna del sfoi “La Usc di Ladins”, la porta dant scomenzadives e projec per fèr cognoscer e slarièr fora l lengaz ladin anter duta la comunanza, la endreza i prumes corsc de alfabetisazion per gregn, la produsc tesc’ e material ladin, la sostegn con gran gaissa l besegn de n lengaz ladin standard e ogne scomenzadiva e projet unitèr che deide a arvejièr la valèdes ladines. Danilo Dezulian cour l’encèria de president de l’Union di Ladins de Fascia per 11 egn, enscin ai 5 de november del 1987. Enlouta la presidenza de la sociazion passa te man del dotor Antone Polam e Danilo Dezulian vegn nominà president onorarie, desche recognosciment per so empegn a favor de la cauja ladina che l portarà inant fin a la mort, stata ai 12 de oril del 2005.

 Antone Polam cour l’encèria de president per passa 20 egn con gran idealism: en ocajion del renovament de la encèries, de dezember del 2007, l dezide de zeder l testamonech e ai 10 de jené del 2008 l Consei nomina president de l’Union di Ladins de Fascia l joen Silvano Ploner, che amò anchecondì vida la sociazion. Te la medema data Antone Polam vegn nominà president onorarie.

Del 2013, al secondo mandat, Silvano Ploner lascia l'encèria de president e endèna che se speta la neva litazions, a jir inant a cef de la sociazion l'é endò Antone Pollam.

Dal 2014, per trei egn, president é stat lità Fernando Brunel da la Riza

Festa d'uton de l'Union di Ladins a Moena

L’Union di Ladins ge sporc sie develpai a chi che se dèsc jù te l’informazion per ladin...

Festa del Rengraziament 2017

L’Union di Ladins de Fascia à l piajer de Ve envièr a la Festa del Rengraziament de chest an a Moena...

L’é vegnù fora l nef numer de “gana”!

En vender prum de setember l nef numer de “gana”, la revista de la eles ladines, é stat prejentà en antepruma a la sozies e i sozi de la sociazion “gana” te n domesdì gustégol e informal a Pera, te Fascia....

N cuer per la Festa dla Unité Ladina

En sabeda ai 15 de messel da les 17.00 a Corvara la manifestazion daurida a duc chi che à a cuer la cossa ladina. La Union Generela di Ladins ti sourandà l reconesciment de merit a comembres de onour...

Festa de l'Unità Ladina 2017

En sabeda ai 15 de messèl a Corvara...

L’Union ve envìa a... n sluch de cultura!

Tel prum apuntament, en vender ai 12 de mé da les 17.15 sun Fedaa, se rejona de geologìa, Marmolèda e minerai...

Fernando Brunel confermà president de l’Union di Ladins

L Consei dut a una ge à renovà la stima. L corirà l’encèria per etres trei egn...

L’Union di Ladins renova l Consei

Ai 18 de firé vegn endrezà la radunanza generèla de la sociazion, con la prejentazion del nef numer de l’Almanach e la litazions: l president Fernando Brunel auza fora l’envit a se meter a al leta...

SUNS Ladinia 2016: gran conzert a Moena

En sabeda ai 19 de november l teater Navalge dèsc alberch al Festival internazionèl de la cianzon de mendranza...

Preon te nosc lengaz

La festa del Rengraziament se aur insnet, vender ai 7 a Vich te Oratorie con la meisa torona sul ladin te la liturgìa. En domenia ai 9 messa grana a Cianacei e benediscion del nef Orazional...

Festa del Rengraziament 2016

“Preon per nosc lengaz" En domenia ai 9 de otober - prejentazion Orazional...

3° Simposie de scultura Toni Gross - Poza

Dai 5 ai 10 de setember del 2016 Poza ge dèsc alberch a la 3^ edizion del simposie internazional de scultura tel legn en memoria de Toni Gross, artist, maester e alpinist....

III Simposie Toni Gross: l’é beleche ora!

Dai 5 ai 10 de setember l zenter de Poza doventarà endò n laboratorie artistich a l’averta con zipiadores che se confrontarà luran fora na opera sul tem “L mond ladin tel patrimonie Unesco”...

Declarazion de l'Union Generela per la reforma al Statut de autonomia de la Region

Declarazion de l'Union Generela di Ladins dla Dolomites (UGDL) en cont dla revijion del Statut de la Region Trentin-Sudtirol...

Scrivete ite a noscia newsletter.

enscinuete descancelete
Privacy
ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy