facebook

N domesdì anter amisc per dir detelpai

L’Union di Ladins a una col Grop Ladin da Moena à endrezà na festa gustegola e informèla per Fabio Chiocchetti del Goti

L’é stat dalbon n bel domesdì chel passà a ge fèr festa a Fabio Chiocchetti del Goti per endrez de l’Union di Ladins de Fascia e del Grop Ladin da Moena.
Fabio Chiocchetti l’é jit en penscion dò esser stat per passa 40 egn diretor te l’Istitut Cultural Ladin, l’istituzion nasciuda de gra a la spenta apontin de l’Union di Ladins de Fascia, sociazion storica de chela che l’é conseier amò anchecondì.
Per chest i amisc de l’Union e del Grop se à pissà na modalità gustegola de ge dir detelpai per dut chel che l’à fat per la cauja ladina e per l sostegn che no l’à mai fat mencèr.
L’é stat endrezà n picol event ma deldut informèl, e chest l’é stat segur n motif de aprijiament, rich soraldut de afet e fradaa sinziera, che ge à dat l met de goder de la compagnìa de sacotanta persones che tel jir di egn l’à abù apede e con chi che l’à spartì legreza, sodesfazions e ite per anter ence vèlch rosch, che se sà ben, te la vita no mencia mai.
A se strenjer apede chest om che amò anchecondì, enceben delujions e despiajeres, l palesa chièr la pascion e l’idealism che à vidà sia azions te duc chisc egn, l’é stat ben segur i amisc de l’Union e del Grop che, cognoscian sie gran amor per la musega, i à envià a viventèr l domesdì i musizisć Davide Monti e Maria Cleary, che à colaborà con i Marascogn e che à endeletà duc i prejenc con la notes maraveouses de la vidola e de l’èrpa e che à compagnà ence la ousc da encant de Angela, sor de Fabio e presidenta del Grop Ladin.
Anter n toch de musega e l’auter, i sacotenc amisc intervegnui, anter chisc la presidenta de l’Union Generela di Ladins de la Dolomites Milva Mussner, l’ex intendent de la Scoles Ladines de Busan Roland Verra, la presidenta de l’Union di Ladins de Gherdena Sofia Stuflesser apede se sà ben al president de l’Union Fernando Brunel, l president onorèr Antone Pollam, i ge à sport dons e paroles de rengraziament sćiantives e sentudes, con emozion e sentiment.
Via per l domesdì l’é stat recordà mingol sie percors, la fasa di ciantastories, con la formazion di Marascogn, e la publicazion de n liber, »I Misteri del Cjaslir«, per talian ma con sacotenc toc ence per ladin, che rejona de fac sozedui acà 400 egn anter Persenon e Fascia, che veit protagonist Daniel Zen prum e soul prinz piscop ladin. Per chest motif la festa é stata endrezèda te chela che l’é stat sia cèsa e che anchecondì l’é na pizzeria che porta sie inom. Monica Cigolla e Loretta Florian à let con gran braùra vèlch toch dal liber che à fat entener delvers la carateristiches de l’autor.
No l’é mencià nience l moment de la rimes de ocajion: Lucia Gross à scrit en rima la desvaliva fases de sia vita e la les à letes jù con l’aprijiament de duc, ma soraldut del festejà.
L’Union e l Grop ensema ge à fat don de na zitra antica, che à ciapà amò maor segnificat da la letura de la poejìa de P. Frumenzio “Mia zìtera”: Fabio à dit che l cognarà se dèr jù per emparèr a la sonèr, donca tel prum davegnir l’arà chest empegn da portèr inant!
Dò aer scutà musega e paroles te n clim seren e sorì, fat ite tel braciacol sinzier di amisc, Fabio, con apede sia femena Pia e sie fi Armin, l’à palesà dut sie aprijiament e sie rengraziament per la festa endrezèda apontin zenza tanta de formalitèdes. »Me piajessa poder dir de aer portà a compiment la miscion – l’à ence dit con na ponta de encresciujum – ma tante robe no le à ciapà pe, ampò de dut chel che l’é stat fat resta na bela pedia per chi che volarà ge jir dò ma no me sente de poder afermar miscion compida.« L’à ence recordà l pensier che vegn uzà fora te la ciantia »La neif d’aisciuda«, l valor de na neveta fora sajon che sobito se delega a soreie ma la porta benefize tel temp: da ca n pez donca se podessa veder i fruc de dut chel che l’é stat semenà.

 


ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy