facebook

L’é vertech l nef Almanach!

En sabeda ai 24 de firé te Sorastanza de la Scola a Sèn Jan vegn endrezà la Radunanza de l’Union di Ladins e prejentà l’Almanach 2017, che ge vegn sport a sozi e aboné fascegn de La Usc

Ence chest an l’Union di ladins de Fascia se endreza a serèr sù l codejel di avenimenc de l’an fenì da pech con sia radunanza anuala, e descheche sozet oramai da 6 egn, apede al bilanz de la sociazion, tant economich che de l’atività portèda inant via per l’an, la ne sporc travers l’Almanach 2017 ence n gustégol e enteressant bilanz di avenimenc più significatives sozedui meis per meis, con la informazions metudes ensema da la redazion de La Usc di Ladins e i evenc de maor emportanza vedui con l’eie ironich e l lapisc spiz de Manuel Riz.

Ence te la neva edizion de l’Almanach, apede a chesta cronaca spezièla, l’Union con sie president Fernando Brunel sporc vigni meis na curta biografìa de n personaje ladin che à segnà la storia o la vita de noscia comunanza. Na galarìa de retrac che doventa de an en an più rica, e che pel esser de utol per coriousc e enteressé, ma ence per la scoles.

 

Na bela colaborazion con la scola

Chest’outa la colaborazion con la Scola Ladina de Fascia la é stata dalbon strenta: de gra prum de dut al professor Thomas Zulian, che l’é ence conseier de l’Union, chest Almanach à podù se emprevaler del bel lurier fat dal grop de robotica “Gome neve” sui ucìe de nosc raion tel projet “Birdtown”. Gialineta, gardelin, chimpl, sforcel, cassola, ègua... vigni meis troon donca n ucel, prejentà con n bel dessegn realisà dal joen grafich Fabian Mosele, che del 2017 se à diplomà al liceo artistich de Fascia, e con l test de la dozenta de scienzes del liceo scientifich prof.ra Elisabetta Demattio. Troon adertura l qr code per poder scutèr coche l cianta!

No l’é da desmentièr che ence Manuel Riz e ence Stephanie Ghetta, che la fèsc dut l lurier de grafica e impaginazion de l’Almanach, l’é doi professores de la Scola Ladina de Fascia.

No podea donca esser post mior chest an per endrezèr la radunanza e la prejentazion de la neva publicazion che te la Sorastanza de la Scola de Fascia.

L’apuntament l’é donca a Sèn Jan en sabeda ai 24 de firé da les 4 domesdì e l sarà viventà ence da la sonèdes de n driz de studenc de la Scola.

La prejentazion é averta a duc, e a chi che à fat o renovà l’abonament a La Usc di Ladins per l’an 2018, o che paa ite l’adejion de sozio a l’Union per l’an 2018, l’Almanach 2017 ge vegn sport debant.

Se pel fèr o renovèr l’abonament o l tesserament ence diretamenter endèna la radunanza. Siede duc envié de cher!

 
  

Scrivete ite a noscia newsletter.

enscinuete descancelete
Privacy
ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy