facebook

“Missus”: la longia batalia de Gejie Furlane

Rua te Fascia l docufilm straordenèr sul percors portà inant da passa 40 egn da preves e laiches tel Friul per poder fèr la liturgìa en “marilenghe”. L vegnarà moscià a Soraga ai 11 de november

Giusta n meis dò la proiezion de gran suzess portèda dant te l’Università de Parma ai 11 de otober, l straordenèr docufilm “Missus” ruarà ence tel raion ladin: l vegnarà portà dant a Soraga, te La Gran Ciasa, en sabeda ai 11 de november, da les 20.30.

La possibilità de veder chest emportant document storich e linguistich ence tel raion ladin é ruèda tel chèder del “Missus Tour”, te chel che Glesie Furlane à portà l film fora per duta la Tèlia e soraldut ti lesc olache vif mendranzes linguistiches. Per l raion ladin la proponeta é stata touta sù da l’Union di Ladins de Fascia e da l’Istitut Cultural “majon di fascegn”. Ma de che se tratel avisa?

 

“Missus”, l film

L film “Missus”, opera del regist Massimo Garlatti-Costa (www.missusfilm.com) l documentea la batalies di preves de Glesie Furlane per la messa tel lengaz furlan.

Dut pea via ai 28 de aost del 1974, canche l Piscop de l’arcidiozesa de Udin l’envìa duc i preves de la Ciarnia a zelebrèr na messa adum te la veiora Pieif mère de Sèn Piere de Zui (Zuglio). I preves, duc furlegn, domana de poder ofizièr per “marilenghe” e a la resposta negativa del Piscop i scrif na letra recordan la parabola del Bon Pèster che chiama sia feides per inom e pech dant dal scomenz i consegna chest document zenza tor pèrt a la zelebrazion.

Da chest at de protesta, unich e straordenèr, nasc Glesie Furlane, n grop de cristiegn e furlegn che travers studies e documentazions chier de jir ite te sia reijes culturèles e religiouses, e pea via n percors de rivendicazion che no à amò troà resposta. Anter i inomes de Glesie Furlane troon l preve e professor Checo Placerean (1920-1986), a chel che l’é dedicà l’Istitut Ladin Furlan, pre Toni Beline e n muie de etres, fin a monsegnor Roberto Bertossi, piovan de Vencion e anchecondì president de Glesie Furlane.

“Missus” conta apontin chesta storia di preves de Glesie Furlane, la Gejia di furlegn, e sia batalia dì per dì per tegnir vif si lengaz.

L’inom del film vegn da n rit musical tradizionèl che vegn amò ciantà tel Friul tel temp da Nadèl, con etres ric veiores che fona sia reijes tel calandèr liturgich del Patriarcat de Aquileia, de chel che ence i ladins fajea pèrt con la Diozesa de Sabion-Persenon enscin a l’an 798.

L documentarie é stat finanzià ence da l’ARLEF (Agjenzie Regjonâl pe Lenghe Furlane) e dal Fondo Regional per l'Audiovisif del FVG; l’é per furlan e l’à i sot titoi tant per talian che per ingleis per poder ruèr tel zircuit nazionèl e internazionèl.

 

L “Missus Tour”

L film “Missus” é stat portà stroz per la Tèlia da chest istà en colaborazions con la sociazion LeM Italia (Lengac del Mediteran) e con desvaliva Universitèdes, ruan te la comunanzes grica del Salento, arbëreshë de Calabria e Sizilia e francoprovenzal de la Puglia.

La proiezion te l’Università de Parma se à vadagnà ence l’atenzion del Corriere della Sera e l’à abù l’aprijiament del dozent de linguistica Davide Astori che l’à sotrissà l’emportanza de chest film, apede che a livel cultural en general, te sie setor de competenza soraldut per entener la dinamiches linguistiches e soziolinguistiches de la mendranzes, prejentèdes te chest film a na vida dassen straordenèra. Gran ence l’enteress da pèrt del publich, che no lascèa più ló de fèr domanes, e grana l’emozion del president de Glesie Furlane pre Roberto Bertossi tel veder l’enteress de la joena generazions per chesta batalies.

La proiezion te Fascia l’é la soula ocajion che vegn metuda dant per duc i ladins de veder chest document de gran emportanza, che met apede la valuta storica e linguistica con n gran empat emotif.

Dò la tapes te nosc raion l tour jirà inant ti raions de lengaz ozitan del Piemont e te la Sardegna per ruèr en ùltima “a cèsa” tel Friul tel temp de l’Avent, apontin canche vegn ciantà l Missus.

 

 
 
 
  
  

Scrivete ite a noscia newsletter.

enscinuete descancelete
Privacy
ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy