facebook

Festa d'uton de l'Union di Ladins a Moena

L’Union di Ladins ge sporc sie develpai a chi che se dèsc jù te l’informazion per ladin

 
   

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

L’é dut vertech per festejèr ence chest an la tradizionèla Festa del Rengraziament. L’Union di Ladins de Fascia endreza chest moment oramai da n grum de egn e ogne an l’é l’ocajion per ge sporjer n detelpai a chi che fèsc vèlch de emportant te la comunanza. Ma l’é ence n moment per se binèr ensema e fèr vèlch reflescion sun argomenc che tocia davejin la jent e la cultura ladina.

Chest an l’argoment cernù l’é i mass media e l ladin e l Consei de l’Union se à pissà de endrezèr na meisa torona per descorer fora chest tem, per tor dant i aspec positives ma ence negatives de na informazion biota per ladin, per veder coluna che l’é la fazion e la doura anter la comunanza de chisc mesi, per analisèr sia storia e sie davegnir.

L’apuntament l’é doman, en sabeda ai 7 de otober da les 4 domesdì, te sala “Simonin Chiocchetti Maza” de la scoles de Moena.

Dantfora l’é i saluc e na introduzion del president de l’Union di Ladins de Fascia Fernando Brunel e dapò sarà l moment del debatit a chel che tolarà pèrt i giornalisć Silvano Ploner, David Lardschneider e la responsabola de l’Ofize di servijes linguistics del Comun general de Fascia Sabrina Rasom, con la moderazion de la giornalista de La Usc di Ladins Lucia Gross. Vegnarà analisà l tem “Ladin e mass media. Besegn o capriz?”.

Sobito dò ge vegnarà sport n pìcol recognosciment ai colaboradores di mass media ladina, n recognosciment per ge dir n develpai de cher per chel che i à fat, ence te egn senestres, per tegnir sù l lengaz, l’informazion e la cultura de noscia jent.

Per serèr sù l Central Bar de Moena ejignarà n bon aperitif che sarà viventà da la musega e da la legreza di “Museganc da zacan”.

La Festa del Rengraziament va inant ence en domenia ai 8 de otober con l moment più religious. Da les 9 se se bina te Piaz de Sotegrava e se va en defilèda fora per paìsc con la Musega da Moena, l’autoritèdes, i Gropes de Folclor e duta la jent fin te gejia de Sèn Vile olache da les 10 don Enrico Conci e don Bruno Daprà disc messa grana per ladin con la cianties del Cor de gejia.

Dò messa sarà vèlch sonèda de la Musega da Moena, la salva di Scizeres de Fascia, i entervenc de salut de l’autoritèdes e per serèr sù n pìcol marindel duc ensema, se l’é bon temp tedant l’Oratorie autramenter se jirà te sala sun sotcuert.

L’Union di Ladins de Fascia ve speta duc chenc doman e domenia a Moena per la Festa del Rengraziament.

Scrivete ite a noscia newsletter.

enscinuete descancelete
Privacy
ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy