facebook

L’é vegnù fora l nef numer de “gana”!

En vender prum de setember l nef numer de “gana”, la revista de la eles ladines, é stat prejentà en antepruma a la sozies e i sozi de la sociazion “gana” te n domesdì gustégol e informal a Pera, te Fascia.

L’é na bela publicazion de ben 100 piates, chesta che la redadores à metù ensema te chest an 2017, per poder seghitèr a sporjer, apede a la produzion on line (www.ganamagazine.it) ence na bela revista de papier, da poder tegnir te man.

L numer 24 de “gana”, l’à desche semper na viesta eleganta e na grafica refinèda, rencurèda da Enrico Doriguzzi, e chest’outa l’é caraterisà da n rich dossier dedicà a la besties e a si raport con la persones: raporc de lurier, de afet, de tema, de pascion e de soravivenza. N muie de articoi, metui adum con l contribut de na lingia de colaboradores e de espertes e esperc, met dant situazions e problematiches desferentes che lea la jent e l mond animal, con stories, ilustrazions e curiositèdes che da spes soscedea marevea.

Apede al dossier troon articoi dediché ai viajes, a l’èrt, a la vita e a l’emancipazion de la eles, e na lèrga é resservèda ence a ic, con l’ejempie de 5 imprenditores economiches fascegn che se dèsc jù te desvalives setores, ence fora da chel dominant del turism, e che i é protagonisć ence del tradizionèl e curious “chestonar de gana” che sera la publicazion.

 

L nef numer de “gana” l’é desche i etres frut del lurier de volontariat de la redazion e di colaboradores e l prezious contribut del Comun general de Fascia sul Pian de l’informazion 2017 e del Departiment Educazion e Cultura Ladina de la Provinzia Autonoma de Busan permet de corir la speises de la grafica e la stampa.

L sarà a la leta te pec dis te la Biblioteches, ti Comuns e ti Istituc Ladins de Gherdena, Fascia e Val Badia, te la Biblioteca de la Eles a Busan, te la sentes de la Unions di Ladins e te Comun general de Fascia.

Per aer de autra informazions, doventèr sozies/i de “gana” o domanèr numeres de archif, se pel se oujer diretamenter a la redatores Ingrid Runggaldier, Olimpia Rasom, Anna Mazzel e Lucia Gross, tras mail a: staff@ganamagazine.it.

 

Scrivete ite a noscia newsletter.

enscinuete descancelete
Privacy
ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy