facebook

N cuer per la Festa dla Unité Ladina

En sabeda ai 15 de messel da les 17.00 a Corvara la manifestazion daurida a duc chi che à a cuer la cossa ladina. La Union Generela di Ladins ti sourandà l reconesciment de merit a comembres de onour

Al é passé n ann da la gran festa sun Ciavazes, che do 70 agn dala pruma gran bineda de jent da dutes les valedes sun l Jouf de Sela, ova dit fora adaut ciamò n iade la volonté de unité dl popul ladin.

Chest isté, ti dis de mez messel, vuel la Union Generela di Ladins recordé chest aniversar onoran persones che à dat n contribut sterch, con dedizion, determinazion y convinzion, per arjonje i fins dla soziazion de duc i ladins y laudan si impegn tl ciamp dla cultura, dla sconanza y dla promozion dl lingaz ladin.

 

La zerimonia y la festa piarà via en sabeda ai 15 de messel da les 17.00 tl Salf dles Manifestazions de Corvara.

Dantaldut sarà l salut y les rejonedes dles autorités. Dapò ti vegnirà sourandé les onoranzes de merit a cater personalités, sciche segn de reconescenza y de dilan per avei porté inant con determinazion, convinzion y impegn l’ativité dla Union Generela di Ladins dla Dolomites.

 

I cater onorés (titol pitl)

L dot. Lois Trebo, stat president dla soziazion dal 1973 al 1979, vegnirà nominé president de onour dla Union Generela di Ladins per si meric y si contribut a la cultura ladina, che vegnirà porté dant te la laudatio dal dot. Giovanni Mischì.

 

L dot. Carlo Willeit, stat president dla soziazion dal 1983 al 1986, vegnirà nominé president de onour dla Union Generela di Ladins per si meric y si contribut a la cultura ladina, che vegnirà porté dant te la laudatio da Hubert Dalponte.

 

L dot. Lois Craffonara vegnirà nominé comember de onour dla Union Generela di Ladins per si contribut a ben dla cossa ladina y dla Ladinia y per si meric tl ciamp dla cultura ladina, che vegnirà porté dant te la laudatio dal dot. Paul Videsott.

 

Benigno Pellegrini vegnirà nominé comember de onour dla Union Generela di Ladins per si contribut a ben dla cossa ladina y dla Ladinia y per si meric tl ciamp dla cultura ladina, che vegnirà porté dant te la laudatio da Stella Palla.

 

A duc i onoré ti vegniràl sport l “cuer ladin” y la scultura de bron che figureia l monument dla unité ladina.

La festa vegnirà viventeda da na bela cornisc musicala con la Uniun Bal Popolar dla Val Badia, la mezsopran Sabina Willeit, la musizista Maria Craffonara y l Cor Fodom.

 

La festa vegnirà sareda su con l Inn Ladin “Bel lingaz dla uma cara” cianté da duc deberieda (l publich giatarà sun l scagn l foliet con l test dla ciantia) y con n renfresch.

 

Duta la popolazion dla Ladina y duc i interessés ala cossa ladina é envié “de cuer” a tò pert.

 

 

Scrivete ite a noscia newsletter.

enscinuete descancelete
Privacy
ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy