facebook

L’Union ve envìa a... n sluch de cultura!

Tel prum apuntament, en vender ai 12 de mé da les 17.15 sun Fedaa, se rejona de geologìa, Marmolèda e minerai

L simbol l’é chela man col polesc su dret del “like”, l “me pièsc”, che oramai duc aon emparà a cognoscer, soraldut sui “social network”, ma a chesta man ge é stat dat jù mingol de color per rechiamèr sobito, a na vida moderna e spontana, i colores de la bandiera ladina. Laìte l’é scrit: “Sluch ladin – Cultura en compagnìa”

Ma che él da nef?

L’é na lingia de scontrèdes pissèdes da n grop de componenc de l’Union di Ladins, con chela de sporjer momenc lijieres e enteressanc averc a duta la jent de Fascia che à gust de stèr en compagnìa e se emprevaler de n sluch de cultura. 

“Sion segures che la cognoscenza che aon de nesc monts, noscia letradura, noscia natura, ma ence de l’èrt e etres aspec del mond maraveous che aon entornvìa, no la é mai assà - disc i organisadores.

Amò apede poder rejonèr per fascian de argoments che da spes vegn sentui bele per talian l’é n stimol che ne à engaissà sobito! E speron che ence duta la comunanza podessa responder a chest envit!”

Se pea via te chisc meisc dant da l’istà con trei bela scontrèdes interessantes: se taca ai 12 de mé con n picol sluch de geologìa, dapò se jirà inant ai 26 de mé con n sluch de poejìa e ai 16 de jugn podaron se goder n sluch de aria de bosch. Nia de senester… duc pel vegnir, scutèr e curiosèr.

Endèna donca l’Union di Ladins de Fascia ve envìa duc en vender ai 12 de mé da les 17.15 sun Fedaa, aló dal Refuge Castiglioni, olache con Alessia Soraruf se podarà rejonèr de Marmolèda, sasc e minerai… con n SLUCH de chel BON! Ve speton de n muie!


ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy