facebook

SUNS Ladinia 2016: gran conzert a Moena

En sabeda ai 19 de november l teater Navalge dèsc alberch al Festival internazionèl de la cianzon de mendranza

 

 

N gran numer de sons, ritmes musicai e idiomes desferenc, rezevarà l publich sabeda de sera ai 19 de november al teater Navalge a Moena en ocajion de “Suns”, parola furlèna che vel dir “sons”.

Suns l’é l festival internazionèl di lengac de mendranza, l’é nasciù tel Friul del 2009 per meter a confront la più enteressantes esprescions musicales di pìcoi lengac, e chest an l rua endò a Moena, olache l’era stat con gran ejit del 2013.

I sons, che se combinarà desche la tesseres te n caleidoscopie per formèr na galarìa de chèdres originèi, l’é chi de la performance de autor, de rock, del rap, del dub, del pop, de l'eletronica e de etres stii musicai bogn de reinterpretèr la tradizion o de perferir tesć poetics o provocatoriees con lengac modergn.

 

Set musizisć o gropes, cernui anter passa vint candidac che vegn da la mendranzes linguistiches de la Tèlia e de l'Europa Alpin/Mediterana, portarà su la paladina i ritmes e i sons di pìcoi lengac: sard, grich, furlan, romanc, francoprovenzèl e ladin naturalmenter.

 

L'é n event de gran prestije, che Moena e Fascia pel endrezèr de gra a l'empegn tecnich e organisatif de la sociazion de musega e cultura “La Grenz” col president Enrico Tommaso, con l'aiut di promotores furlegn (en particolèr Arlef e Radio Onde Furlane) e col sostegn finanzièl de la Provinzia de Trent - Servije Mendranzes linguistiches - e de la Region Trentin Sudtirol e col sostegn del Comun General de Fascia, del Comun de Moena, del NPLD, de l'Azienda de Promozion Turistica de Fascia, de l'Istitut Cultural Ladin e de La Usc di Ladins.

 

Endèna chesta sera ecezionèla, con entrèda ledia, se podarà votèr l musizist o l grop preferì. Does de la cianzons proponetes se vadagnarà defat l derit de entrèda a finèla europeana del contest, che sarà a Udin ai 3 de dezember: una sarà chierida fora da la jurìa tecnica, formèda da raprejentanc de duta la comunanzes de lengaz minoritèr che partezipea, l'autra sarà chela che ciaparà l numer maor de stimes dal publich, che podarà votèr con na scheda data fora endèna l conzert.

 

A se garejèr la preferenzes del publich ge sarà anter l'auter ben does proponetes dal post: l musizist Marco Mattia e l cater joegn liceai del grop “Berdon”.

La prejentazion del conzert l la farà l'ator furlan Michele Polo e a la ciantarina e musizista ladina Martina Iori - jà venjidora de Suns 2014.

Amò apede sun paladina del Navalge se podarà sentir ence la ousc del musizist fascian Stefano Merighi, che parteziparà desche ghest.

 

Duc donca é en envié sabeda da les 21.00 te teater Navalge de Moena per partezipèr a chest event internazionèl che dèsc prestije a la mendranzes linguistiches tras l lengaz universèl de la musega.

 

I partezipanc a SUNS Ladinia 2016

L componist eletronich e live performer sard “Arrogalla” (Francesco Medda) che prejenta “Is” n tòch che pesća te la produzion de la world music la elaboran ti lengac del dub e de la musega contemporana;

l ciantautor de la Grecìa Salentina Rocco de Santis che con “Kama” reinterpretèr la tradizion ciantan sie versc poetics tel grich; l “rapper anomalo” furlan Doro Gjat, che con “Discolce” (Descouza) fèsc front con n sound enteressant l tem de l'emigrazion e del retorn a la tera;

- She, York, la proponeta refinèda de la ciantautora romancia Sarah Clavadetscher che prejenta “Solitari”, n tòch che rejona de raporc interpersonèi e individualism;l grop ozitan/francoprovenzèl “Trip” che straouc l'essenza de la musega e del bal tradizionèl co la sonoritedes del rock progressif e de l'eletronica te “Fan qui la viro”; l musizist ecletich e producer Marco Mattia da Vich, che prejenta l tòch “Maraveous”, che dèsc l titol a si prum CD, jit fora chest an; l n muie joegn “Berdon”: 4 liceai de la Scola de Fascia che à metù sù da pech l grop, desmostran sobito gran talent e grinta, e a Suns propon “La not de Krampus”.

 


Scrivete ite a noscia newsletter.

enscinuete descancelete
Privacy
ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy