facebook

Preon te nosc lengaz

La festa del Rengraziament se aur insnet, vender ai 7 a Vich te Oratorie con la meisa torona sul ladin te la liturgìa. En domenia ai 9 messa grana a Cianacei e benediscion del nef Orazional

L’Union di Ladins de Fascia à anter si obietives chel de tegnir sù e slarièr fora la doura del lengaz ladin te duc i ciampes, ence chel de la gejia. Per chest la se dèsc jù per endrezèr i pelegrinajes aldò de la tradizion de noscia jent, dant a la Madona de Baissiston e te chisc ùltimes egn, ensema a la Union Generèla di Ladins dla Dolomites e l’autra sezions de valèda, al Sènt ladin da Oies, Sèn Giosef Freinademetz.

Se oujer al Segnoredio per fascian l’é preèr con la paroles che vegn dal cher, dai sentimenc più vejins a l’ènema. Preèr tel lengaz de la mère l’é semper stat zeche de naturèl per noscia jent soraldut en ocajion de la festes di Sènc e de la Sèntes. Per chest l’Union di Ladins, ensema a la Comiscion per la cultura del Decanat de Fascia, l’à volù regoer la orazions di fidei che é states scrites te noscia Parochies e les publichèr ensema a la traduzion dal talian de cheles da durèr via per dut l’an de la Gejia.

L’Orazional per la orazions di fidei vegn prejentà a la meisa torona che l’Union di Ladins e la Comiscion decanala à endrezà per chesta sera, vender ai 7 de otober da les 20.30, te sala grana de tobià de l’Oratorie de Vich. Vegnarà rejonà del ladin te la liturgìa ensema ai preves de Fascia e ai esperc Paul Videsott, Cesare Bernard e Stefano Lazzer, col compagnament de la Corala Sènc Piere e Paul da Soraga. A la fin sarà ence n bon marindel enjignà da la volontadives da Vich per se passèr amò n gustégol moment duc ensema.

L’Orazional vegnarà benedì e dat fora a duta la Parochies e ai Consees Pastorai de Fascia, en segn de rengraziament per chel che i fèsc per noscia comunanzes cristiènes, en domenia ai 9 de otober en ocajion de la messa del Rengraziament che vegn zelebrèda dal decan don Mario Bravin te gejia del Sacro Cher de Cianacei da les 10.30. Dantfora sarà na defilèda da Piaz Marconi con la Musega Auta Fascia, la autoritèdes e i Gropes de Folclor. Sobito dò messa conzert de la musega, descorsc e n bon mezmesdì enjignà dai volontadives del Club Pietrone. (mci)

ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy