facebook

III Simposie Toni Gross: l’é beleche ora!

Dai 5 ai 10 de setember l zenter de Poza doventarà endò n laboratorie artistich a l’averta con zipiadores che se confrontarà luran fora na opera sul tem “L mond ladin tel patrimonie Unesco”

Dò l bon ejit abù con la pruma edizions del 2012 e 2014, a Poza l’é jà beleche dut enjignà per la terza edizion del Simposie bienal de scultura tel legn dedicà a Toni Gross, artist, maester e alpinist, stat ence a cef de la Scola d’èrt.

La Scola Ladina de Fascia - Liceum del Design e de la Èrts, l’Union di Ladins, l Comun de Poza e l’Istitut Cultural Ladin à metù adum la forzes e troà n bon sostegn publich e privat per portèr a compiment chesta bela scomenzadiva, che dai 5 ai 10 de setember farà doventèr dut l zenter del paìsc de Poza n gran laboratorie artistich a l'averta.

L’obietif de chest simposie, apede se sà ben a recordèr la fegura de Toni Gross, l’é chel de ge sporjer a la jent de Fascia e ai ghesć, te n temp che la sajon da d’istà va pian pian a se serèr sù, na ocajion de entrategniment tel segn de la cultura e de l’èrt. Apede chest se vel valorisèr la Scola d’èrt, ativa a Poza da passa 70 egn, e fèr crescer anter la comunanza la sensibilità per l’èrt e per la scultura.

 

L lurier, la jurìa e i artisć

Unesc artisć selezioné se confrontarà sul tem “L mond ladin tel patrimonie Unesco” luran fora na bora de zirm auta zirca 180 zm. Se podarà i veder a l’opera, te la postazions enjignèdes dò n percors che da Piaza de Comun se dejouc envers Piaza del Malghèr e l tendon de la manifestazions, per ruèr al parch jeghes, da en lunesc ai 5 enscin en sabeda ai 10 de setember via per dut l dì.

I partezipanc é spartii te 2 sezions: artisć ghesć, de esperienza internazionèla, e artisć ex studenc de l’Istitut d’Èrt de Poza, i prumes l’é Carlo Abbà dal Piemont, Giovanni Cappelletti da la Lombardia, Thierry Lauwers dal Belgio, Gianangelo Longhini dal Venet e Klaus F. Unsicker da la Germania, e i ex studenc de la Scola d’èrt l’é Paolo Costazza (venjidor pel premie del publich te la pruma edizion del simposie) Tomaso Baldassarra, Soel Costantin, Alessio De Marco, Stefania Pederiva e Lara Steffe.

En sabeda ai 10 i cognarà aer fenì sia operes, che vegnarà valutèdes da na jurìa che à desche presidenta Orietta Berlanda, che l’à ensegnà ence te la Scola d’èrt de Poza e ades la é ensegnanta a l’Academia de Milan e enciasèda te la Val Badia. I etres componenc de la jurìa l’é i artisć e esperc Claus Soraperra, Daniela Brovadan, Maurizio Detomas, Mara Nemela, e la grafica fia de l’artist, Lucilla Gross.

La jurìa dezidarà 2 venjidores, un per la sezion artisć ghesć e un per la sezion artisć ex studenc, che i vegnarà premié en sabeda ai 10 da les 6 da sera tel tendon de la manifestazions con musega e entrategniment.

 

L laboratorie didatich e la mostra

Tel medemo tendon fora per duta la setemèna se podarà veder na esposizion de autra operes di artisć partezipanc, che i pel coscita aer na ocajion de più per se fèr cognoscer e aprijièr dal publich e la sabeda i vijitadores arà ence l met de votèr la opera che ge pièsc de più e de curiosèr anter i stonc de cultura, promozion e magnadiva, no demò de Fascia ma ence da la Grecìa Salentina, ajache apontin te chi dis l’é en program ence na fradaa co la mendranza linguistica Grika.

L Simposie Toni Gross ge dèsc ence l met al Liceum del design e de la Èrts “Giuseppe Soraperra” de ge perferir na bela ocajion de crescimonia didatica a si studenc, che i podarà jir a veder i artisć a l’opera e n pìcol grop de studenc di ùltimes egn podarà ence tor pèrt ativamenter al laboratorie didatich, proan a zipièr dedant al publich apede ai artisć de maor esperienza, sot la direzion del professor Tiziano Deflorian, didà da Andrea Dorigatti e Davide Deflorian. (lg)

 

ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy